Мажарстан ұлттық музейінде «Еуропалық ғұндар. Далалық археологияның соңғы нәтижелері» тақырыбында ғылыми конференция өтті.

Конференцияға қатысқан Мажарстан, Қазақстан, Өзбекстан, Әзербайжан, Түркия, Моңғолияның жетекші музейлері мен ғылыми-зерттеу институттарының өкілдері және ғалымдар соңғы жылдары жүргізілген далалық археологиялық, археогенетикалық зерттеулердің нәтижелері бойынша баяндамалар жасады.

Сонымен қатар, Будапешт қаласында ТҮРКСОЙ Бас хатшысы С.Раевтың қатысуымен, Музейлер бірлестігі үйлестірушілерінің 4-ші кездесуі өтті. «ТҮРКСОЙ» Музейлер бірлестігіне мүше елдердің үйлестірушілері семинары музей ісі саласындағы кәсіби диалог пен тәжірибе алмасуға арналған тұрақты халықаралық алаң болып саналады.

Жиында 2026 жылы Түркі әлемінің мәдени астанасы – Әндіжан қаласында өтетін Түркі әлемі музейлері жетекшілерінің 5-ші кездесуіне дайындық және бірлескен ғылыми жобаларды жүзеге асыру, бұнымен бірге «Әндіжан – Түркі әлемінің мәдени астанасы 2026» аясында өтетін іс-шаралар кешені талқыланды.

Сондай-ақ, Түркі әлемінің музей саласын дамытуға серпін беретін ТҮРКСОЙ музейлер бірлестігінің Премиясын тағайындау туралы шешім қабылданды. Кездесу барысында аталған бірлестікке мүше ретінде енген музейлерге арнайы сертификаттар табысталды.